zindagi- ek ladki ki

zindaagi ki kokh se,
hazaron dard sehte hue,
nikli ek aur zindagi.

are..... ye kya????? ye to hui main; ek ladki!!!

maa ke aanchal mein,
pita ke pyaar mein,
chalne lagi meri zindagi.

madmast chali main,
madhosh chali main,
ek ladki hoon main,
aur khush hoon main.

sakhiyon sang main fugdi karti,
chhota sa main gharonda banati,
gudde-gudiyon sang khel-khel ke,
unme apni khushiyan dhundti.

kal-kal behte jharne si main,
shudh sungadhit basanti hawa si main,
chahchahati chidiya si main,
ud rahi hoon neele gagan mien main.

uss padav pe aaj pahuch gayi,
neela gagan ban gaya hai aanchal mera;
na jaane kisne dastak di,
nanha sa kona dil ka mera;
khadi hoon main aaj ithlaati,
mere chaaron ore uski baahon ka ghera.

zindagi ki raahon mein chalna hai mujhko,
haath thaam ke uska,
aaj bas yahi hai,
ek hi sapna mera.

sapna poora karne ke liye,
haath thaam ke uska
chhod chali main ghar-aangan mera.

vishwaas tha mujhko uspe; apne pyaar pe,
nikal gayi main door; bahut door,
apne ghar se; apne gaaon se.

shehar ki is bheed-bhaad mein,
aaj akeli khadi hoon main.

wo khada hans raha hai mera pyaar,
bana diya jisne mujhe in bhediyon ka shikaar,
taandav karne aaye mujhpar,
ye hain mere thekedaar,
noch liya hai mere ang-ang ko,
cheer diya mere antarmann ko.

khadi hu main bebas lachaar,
kolahal mere jeevan mein.

lekin...... kyon chaayi hai mere jeevan mein bebasi?????
mujhme bhi hai shakti,
aakhir main hoon ek ladki.

na main ghabraaungi,
na main hichkichaungi,
ladungi main.

chahe saamne ho duniya poori,
sabko bataungi main,
aakhir main hoon ek ladki; durga; kaali; jeevandaayini.